Angkas

ANGKAS

madalas, inaangkasan lang natin ang patawa

ng kaibigang kalog o ng simpleng kakilala

basta huwag 'below-the-belt' o nakasisira na

sa ating pagkatao o sa dignidad ng kapwa

maraming riding-in-tandem ang gumawa ng krimen

ang angkas ang madalas bumira't siyang asasin

dapat may katarungan at mahuli ang salarin

hustisyang panlipunan ang marapat pairalin

manggagawa ang motor ng pambansang ekonomya

sapagkat di uunlad ang bansa kung wala sila

di lamang sila simpleng angkas sa kapitalista

sila na ang nagmomotor, sila pa ang makina

minsan, sa kanyang motorsiklo ako'y angkas agad

nang marating namin ang pupuntahang aktibidad

nang isyung pangmasa'y malinaw naming mailahad

nang kabulukan ng sistema'y aming mailantad

- gregoriovbituinjr.

01.26.2022

Paggawa

PAGGAWA

dapat pang ipaglaban ang hiling at karapatan

ng mga manggagawang nagrarali sa lansangan

bakit? di ba't sila ang lumikha ng kabuhayan?

bakit ba sila'y api't tila di pinakikinggan?

bakit kapitalistang kuhila ang naghahari

at ginawang sagrado ang pribadong pag-aari?

bakit nasa ituktok ang burgesya, hari't pari?

bakit lugmok ang buhay ng manggagawa't kauri?

manggagawa ang tagalikha ng yaman ng bansa

pag-unlad ng ekonomya'y sila rin ang may gawa

kaya imortal ang misyong ito ng manggagawa:

ang daigdig ay buhayin ng kamay ng paggawa!

ganyan nga kahalaga ang paggawa sa daigdig

binubuhay ang sangkatauhan ng diwa't bisig

O, manggagawa, kapitalismo'y dapat malupig

kaya kayo'y magkaisang-diwa't magkapitbisig

- gregoriovbituinjr.

01.24.2022

Kalibre

KALIBRE

anong kalibre ng kakayahan at pagkatao

ang hanap natin sa sunod na lider ng gobyerno

yaon bang sa debate'y di nagpakita sa tao

o ang matagal naglingkod bilang lider-obrero

anong kalibre ng organisadong mamamayan

ang babago sa sistemang tadtad ng kabulukan

yaong magtatatag ng sistemang may kabuluhan

sa sambayanang nais ay makataong lipunan

dapat bang may kalibre ang tibak upang magwagi

laban sa sistemang bulok ng trapo't naghahari

puspusang nakikibaka, palaban, mapanuri,

makakalikasan, makatao, at makauri

ang kalibre'y di palyado pag iyong kinalabit

matibay din ang pulso pag umasinta't bumirit

tulad ng mahusay na lider na iginigiit

ang karapatan at hustisya sa mga ginipit

- gregoriovbituinjr.

01.23.2022

Construction worker

CONSTRUCTION WORKER

kaytaas ng inyong ginagawa

aba'y talagang nakalulula

buwis-buhay ang trabahong sadya

huwag sanang disgrasya'y mapala

upang pader ay palitadahan

ay parang gagambang nag-akyatan

sa mataas na gusaling iyan

tiyak ba ang inyong kaligtasan?

sapagkat kayo'y construction worker

na nagpapalitada ng pader

anumang atas ng inyong lider

ay tatrabahuhin n'yo, anywhere

sinuong ang panganib, sumunod

para sa pamilya'y kumakayod

buwis-buhay, magkano ang sahod?

sanay ba sa lula kayong lingkod?

isa n'yo nang paa'y nasa hukay

isang pagkakamali lang, patay

sana'y mag-iingat kayong tunay

pagkat isa lang ang inyong buhay

- gregoriovbituinjr.

01.23.2022

* litratong kuha ng makatang gala sa katapat ng napuntahang gusali

Enero 22, 1987 sa Mendiola

ENERO 22, 1987 SA MENDIOLA

Magbubukid na may isyung dala'y nagtungong Mendiola

Gobyernong pasista nama'y nagpasalubong ng bala

At naganap ang pagkalugmok ng mga magsasaka

Bumulagta'y labingtatlo, sugata'y limampu't isa

Ang panawagan ng magsasaka'y repormang agraryo

Yamang katatapos ng Edsa't mayroong pagbabago

Ang hiling nga'y dapat tugunan ng gobyernong Aquino

Ngunit nagrali'y binira ng mga unipormado

Isyung dugtong ng bituka ang dala ng magbubukid

Ngunit nagkibit-balikat lamang ang gobyernong manhid

Gayong isyung ito'y mahalaga sa mga kapatid

Magsasaka pa ang sa sariling dugo ibinulid

Ang kanilang panawagan ay binahiran ng dugo

Ginulantang sila't labingtatlong buhay ang naglaho

Samantalang sa bukid, tanim nilang palay ay ginto

At siyang bumubuhay sa mayoryang tao sa mundo

Sana isyung dinala nila'y mapag-usapan naman

At mabigyang katugunan at matupad kalaunan

Katarungan nawa'y kamtin ng magsasakang pinaslang

At mausig at mapanagot ang mga pusong halang

- gregoriovbituinjr.

01.22.2022

Enerhiyang solar sa opisina

ENERHIYANG SOLAR SA OPISINA

naglagay ng enerhiyang solar sa opisina

kung saan mula sa araw, kuryente'y makukuha

bayad nga ba sa Meralco'y bababa ang halaga

iyon naman ang layunin, presyo'y mapababa na

kaya gayon na lamang ang saya naming totoo

sa opis na binabantayan ko't nagtatrabaho

dito sa Bukluran ng Manggagawang Pilipino

sa ikalawang palapag inilagay nga ito

sa buhay-aktibista't buhay-makakalikasan

sa simpleng pamumuhay, pakikibakang puspusan

ang solar-panel ay tulong na sa kapaligiran

lalo sa nais itayong makataong lipunan

pasalamat sa Philippine Movement for Climate Justice

sa kanilang tulong upang solar ay maikabit

mula sa mahal na kuryente'y di na magtitiis

pagtaguyod ng solar energy'y ating ihirit

- gregoriovbituinjr.

01.21.2022

* litratong kuha ng makatang gala sa opening ng solar panel sa tanggapan ng BMP sa Pasig, 11.27.2021

* kasama sa litrato sina Ka Leody de Guzman, chairman ng BMP at tumatakbong Pangulo sa Halalan 2022, si Ka Luke Espiritu, president ng BMP at tumatakbong Senador sa Halalan 2022, Kapitan Bebot Guevara ng Barangay Palatiw, Lungsod ng Pasig, at Konsehal Quin Cruz, Lungsod ng Pasig

Binhi

BINHI

maaga pa lang, kita kita

kasalamuha na ang masa

magaling kang mag-organisa

upang mabago ang sistema

kasangga kita at kauri

sa pagtatanim nitong binhi

ng pagbabago't walang hari,

walang burgesya, walang pari

isang makataong lipunan

ang ating itatayo naman

pagsasamantala'y wakasan

pairalin ang katarungan

patuloy ta sa misyon natin

upang magawa ang layunin

upang gampanan ang tungkulin

upang tupdin ang adhikain

yakap ang simpleng pamumuhay

puspusang makibakang tunay

taglay ang prinsipyong dalisay

aktibista hanggang mamatay

- gregoriovbituinjr.

01.19.2022

Pangarap

PANGARAP

ah, napakatayog ng pangarap

nakatingala sa alapaap

kahit buhay ay aandap-andap

ay patuloy pa ring nagsisikap

nakatira man sa gilid-gilid

sa danas na pagkadukha'y manhid

basta't nabubuhay nang matuwid

mararating din ang himpapawid

nangarap ngunit di pansarili

kundi pag-asenso ng marami

sa sistemang bulok masasabi

palitan na't huwag ikandili

ang pangarap niyang itinakda

kasama'y organisadong dukha

pati na ang uring manggagawa

lipunang makatao'y malikha

- gregoriovbituinjr.

01.18.2022

Pula't dilaw

PULA'T DILAW

pinagninilayan ko pa rin

ang mga palad nating angkin

paano kaya tutukuyin

sinong mga lumalambitin

sa baging ng mga haragan

kasama ang trapo't gahaman

anang awit, pula't dilaw man

ay di tunay na magkalaban

pangmayaman daw ang hustisya

na nabibili ng sampera

kung ganyang bulok ang sistema

aba'y kawawa nga ang masa

kung sistemang bulok ang gawa

nitong mga trapong kuhila

wala na ba tayong kawala

sa pagsasamantalang sadya

pula't dilaw ba pag naupo

kabulukan ba'y maglalaho

magtutulong ba pag nagtagpo

o sa malaon ay guguho

sistema pa rin ay baguhin

ito pa rin ang pangarapin

ang masa'y ating pakilusin

tungo sa bayang asam natin

- gregoriovbituinjr.

01.16.2022

Ituloy ang laban

ITULOY ANG LABAN

"Ituloy ang laban" ay kilalang islogang tibak

ito'y batid na ng bayan, panawagang palasak

makasaysayan, prinsipyo ng api't hinahamak

upang baguhin ang sistemang loko't mapanlibak

ngunit sa basketbol pala'y ginamit nang totoo

"Ituloy ang laban" sa mga kasagupang grupo

ito ba'y katanggap-tanggap o nakakatuliro

bagamat walang may-ari ng panawagang ito

maganda ngang masanay ang tao sa panawagan

marehistro sa isip nila'y "Ituloy ang laban!"

paalala sa gawa ng bayani't Katipunan

sistema'y baguhin tungong makataong lipunan

"Ituloy ang laban" nilang atleta sa basketbol

habang diwa ng islogang ito'y dapat masapol

buhay ng tibak ang sa islogang ito'y ginugol

laban sa pagsasamantalang sadya silang tutol

"Ituloy ang laban" ng dukha't uring manggagawa

tunay na kahulugan nito'y isapuso't diwa

lipunang makatao'y dapat itayo ng madla

"Ituloy ang laban" at kamtin ang ating adhika

- gregoriovbituinjr.

01.15.2022

- selfie ng makatang gala sa tarpouline ng Philippine Basketball Association (PBA) nang mapadaan siya sa Araneta Coliseum sa Cubao, Lungsod Quezon

Wakas

WAKAS

sa malao't madali, sa mundo'y mawawala na

sa madla'y walang maiiwang bakas o pamana

kundi pawang tula't sanaysay ng pakikibaka

upang kamtin ng bayan ang panlipunang hustisya

wala na tayong mararamdaman pa pag namatay

kaya gawin natin ang wasto habang nabubuhay

sa pakikibaka man, isang paa'y nasa hukay

sa pag-oorganisa ng masa'y magpakahusay

nais ko mang mawala sa edad pitumpu't pito

ngunit baka abutin naman ng walumpu't walo

si F. Sionil Jose'y namatay siyamnapu't pito

gayong edad ay di ko na aasahang totoo

basta gawin kung anong wasto, sulat man ng sulat

bagaman ang binti'y malimit nang pinupulikat

ang mahalaga'y nakikipagkapwa't nagmumulat

tungo sa makataong lipunang siyang marapat

- gregoriovbituinjr.

01.13.2022

Pag-asa

PAG-ASA

isang marubdob na pakikiisa sa Partido

Lakas ng Masa na sa ngayon ay nagpapatakbo

ng kandidatong manggagawa sa pagkapangulo,

bise presidente at tatlo para sa senado

ating ipanalo ang Partido Lakas ng Masa

sa partylist, at biguin ang mga dinastiya

Manggagawa Naman ang iluklok sa pulitika

sila'ng dahilan kaya umunlad ang ekonomya

ibabagsak natin ang mga trapong mapagpanggap

mga kandidato ng kapitalistang mahayap

na sa manggagawa't dukha'y di naman lumilingap

kaya ang mga ito'y patuloy sa paghihirap

ah, pag-asa ang sa Partido'y aming natatanaw

na sa kabulukan ng sistema'y siyang lulusaw

pagbabago't lipunang makatao ang lilitaw

na siyang ating adhikain sa bawat pag-igpaw

- gregoriovbituinjr.

01.09.2022

* selfie ng makatang gala sa tapat ng tanggapan ng Bukluran ng Manggagawang Pilipino (BMP) sa Pasig

Paracetamol

PARACETAMOL

kahindik-hindik na balitang umabot sa masa

wala nang mabiling paracetamol sa botika

nagkakaubusan, paano ngayong maysakit ka

ubo't nilalagnat, sana'y di COVID iyan, iha

sa usaping supply and demand, tataas ang presyo

ng produktong kulang sa suplay na nais ng tao

kung sobra ang suplay, dapat magamit ang produkto

ay tiyak na magmumura naman ang presyo nito 

lalo ngayong omicron variant daw ay lumalala

at mas matindi pa raw sa ibang virus ang taya

kaya sa mga botika ang mga tao'y dagsa

nang makabiling gamot sa sakit na nagbabadya

di natin masisisi kung mga tao'y dagsaan

lalo sa balitang gamot ay nagkakaubusan

dahil iyon ay mayor nating pangangailangan

upang buhay ng pamilya'y agad masagip naman

sana'y walang mag-hoarding ng mga produktong iyon

ilalabas saka ibebentang mas mahal yaon

bulsa ng kapitalista'y tiba-tiba na roon

dapat parusahan ang gagawa ng krimeng iyon

- gregoriovbituinjr.

01.09.2022

* balitang halaw sa pahayagang tabloid na Pilipino Star Ngayon, Enero 5, 2022, pahina 2

Lansangan

LANSANGAN

madalas kong tahakin ang aspaltadong lansangan

na sa tuwina'y mabibilis yaong mga hakbang

animo'y hinahabol ng mga sigbin at aswang

habang nangangamoy asupre yaong lupang tigang

di ko mawari sinong sa akin ay sumusunod

tatambangan ba dahil sa bayan ay naglilingkod

dahil ba ako'y isang masugid na tagasunod

bilang aktibistang sa rali raw sugod ng sugod

ngunit payapa pa rin akong sa daan tumawid

panatag ang loob na sa dilim di mabubulid

habang samutsaring isyu ng bayan ay di lingid

patuloy ang pagbaka habang nagmamasid-masid

dapat pandama'y patalasin at laging ihasa

upang maging handa sa mga daratal na sigwa

lalagi akong kakampi ng uring manggagawa

habang tinatahak ang landas ng kapwa dalita

- gregoriovbituinjr.

01.09.2022

Kuyom ang kaliwa kong kamao

KUYOM ANG KALIWA KONG KAMAO

kuyom ang kaliwa kong kamao

hangga't wala pa ring pagbabago

hangga't api ang dukha't obrero

at nariyan ang kapitalismo

na sistemang mapagsamantala

sa lakas ng karaniwang masa

hangga't naghahari ang burgesya

at trapong sakim at palamara

ramdam ang sa lupa'y alimuom

hangga't manggagawa't dukha'y gutom

ibig sabihin, sa simpleng lagom

manananatiling kamao'y kuyom

itaas ang kamaong kaliwa

bilang simbolo't kaisang diwa

ng bawat dalita't manggagawa

sa pakikibaka'y laging handa

- gregoriovbituinjr.

01.02.2022

* drawing mula sa google

Pag-asa

PAG-ASA

umaasa pa ba tayong maglilingkod ng tapat

sa sambayanan ang mga trapong burgis at bundat

na upang mahalal, sa masa'y sasayaw, kikindat

habang korupsyong gawa nila'y tinatagong sukat

umaasa pa ba tayong maglilingkod na tunay

sa bayan yaong mga trapong kunwa'y mapagbigay

na pag naupo sa pwesto'y di ka na mapalagay

dahil limot na nila ang mga pangakong taglay

o lider-obrero ang ipantapat sa kanila

na ang dala'y pag-asa't pagbabago ng sistema

may prinsipyong angkin at tagapaglingkod ng masa

lider ng paggawang lalabanan ang dinastiya

hahayaan bang bulok na sistema'y manatili

at muling manalo yaong burgesya't naghahari

saan tayo tataya kung tumakbo na'y kauri

iwaksi na ang trapo, manggagawa'y ipagwagi

- gregoriovbituinjr.

01.02.2022

#manggagawanaman

#laborpower2022