P750 MINIMUM WAGE, NGAYON NA
seven hundred fifty pesos minimum wage, ngayon na!
panawagan ng manggagawa habang nagmamartsa
simpleng kahilingan sa gobyerno't kapitalista
ito kaya sa kanila'y maibigay talaga?
seven hundred fifty pesos kasama ang rehiyon
across-the-board, presyo ng lakas-paggawa, minimum
kaya naman iyan ng malalaking korporasyon
ayaw lang ibigay, sa tubo'y kabawasan iyon
ang pinaglalaban nila'y makatarungan lamang
ngunit mga naghaharing uri'y talagang dupang
sa tubo, gayong sa lakas-paggawa'y nakinabang
ayaw lang ibigay pagkat sa tubo nga'y suwapang
pakinggan sana ang panawagan ng manggagawa
pagkat sila ang umukit ng daigdig at bansa
nagpalago ng ekonomya ng bansa'y sila nga
pagkat kung walang manggagawa, pag-unlad ay wala
- gregoriovbituinjr.
05.03.2023
* litratong kuha ng makatang gala habang nagmamartsa sa España patungong Mendiola, Mayo Uno, 2023
Walang komento:
Mag-post ng isang Komento